A landslið karla mætir Mexíkó í vináttulandsleik í Bandaríkjunum 30. maí næstkomandi en KSÍ tilkynnti þetta í dag.
Íslenska liðið leikur því þrjá vináttuleiki í sumar en þeir fara allir fram erlendis.
Áður hafði KSÍ staðfest leiki við Færeyjar 4. júní og við Pólland 8. júní.
Leikurinn við Mexíkó fer fram á AT&T leikvanginum í Arlington, Texas. Ísland og Mexíkó hafa mæst fjórum sinnum áður í vináttuleikjum og hafa allir leikirnir farið fram í Bandaríkjunum. Markalaust jafntefli var niðurstaðan í fyrstu tveimur leikjunum, en Mexíkó hefur haft sigur í þeim tveimur síðari.
Leikurinn í Færeyjum er fyrsti opinberi leikurinn á Þórsvelli eftir endurbætur. Leikurinn við Pólverja fer fram í Poznan og er liður í lokaundirbúningi pólska liðsins fyrir úrslitakeppni EM.
Næstu leikir í undankeppni HM eru síðan í september en þá koma Rúmenía, Norður-Makedónía og Þýskaland í heimsókn á Laugardalsvöll öll í sömu vikunni.
Athugasemdir