Sterkastur í 13. umferð - Nálgast sitt besta form eftir erfið meiðsli

Aron Elís Þrándarson leikmaður Víkings er Sterkasti leikmaður 13. umferðar Bestu deildarinnar en hann skoraði tvö mörk í 3-2 endurkomusigri gegn KA. Aron sleit krossband í fyrra og hefur verið að eflast eftir því sem á tímabilið hefur liðið.

„Aron var út um allan völl í dag. Hann vann einvígi á miðjunni og var alltaf mættur inn í boxið. Tvö góð mörk hjá Aroni í dag sem er að nálgast sitt besta," skrifaði Helgi Inguson, fréttamaður Fótbolta.net, í skýrslu sinni um leikinn.

Aron mætti í viðtal við Fótbolta.net eftir leikinn.

„KA menn voru mjög öflugir í dag. Við byrjuðum vel, komumst í 1-0. En svo kemur smá værukærð og við förum að vera of óvandvirkir. Þeir komast inn í þetta, komast 1-2 yfir og það tekur bara smá tíma að koma til baka," sagði Aron.

„Við höfum að talað um að leikurinn fyrir Evrópu hafi alltaf verið eitthvað bras. Hvort menn séu komnir aðeins lengra en þeir eiga að vera, ég veit það ekki. En bara mikilvægt að fá einn svona sigur, þetta hafa verið sigrar sem við siglum heim eftir að vera tveimur til þremur mörkum yfir en við þurftum að sækja þennan."