Jón Þór Hauksson
Jón Þór Hauksson, þjálfari íslenska kvennalandsliðsins var sáttur með 6-0 sigurinn á Lettlandi í kvöld.
Lestu um leikinn: Lettland 0 - 6 Ísland
Íslenska liðið spilaði á afar erfiðum velli en var þó búið að undirbúa sig undir það. Hann var ánægður með frammistöðu liðsins.
„Leikurinn var frábær og sigurinn var frábær. Það var gleðiefni fyrir okkur að ná að skora þetta mörg mörk og ná að halda áfram við erfiðar aðstæður, erfitt að spila fótbolta og mér fannst við gera þetta vel í 90 mínútur," sagði Jón Þór.
Gunnhildur Yrsa Jónsdóttir spilaði bakvörð í dag og átti góðar fyrirgjafir. Hún lagði upp fyrsta markið með einni slíkri.
„Gunnhildur var frábær í þessum leik og virkilega góðar fyrirgjafir og við útfærðum hlaupin okkar vel inn í teig og kláruðum vel. Ég var í skýjunum með það."
„Við vorum miklu betra liðið frá fyrstu mínútu og margt sem ég er ánægður með. Þetta var fagmannleg frammistaða í 90 mínútur. Við erum að kveðja virkilega gott landsliðsár og frábært að enda það með sigri. Hvert mark telur í þessu og förum með fullt sjálfstraust í nýtt landsliðsár," sagði hann í lokin.
Athugasemdir
