Björn Aron Björnsson hefur gengið til liðs við Njarðvík í Lengjudeildinni en hann skrifar undir samning sem gildir til ársins 2025.
Björn, sem var valinn leikmaður ársins hjá Víði á síðasta ári, er 22 ára gamall bakvörður sem er uppalinn hjá Keflavík. Ásamt Keflavík hefur hann spilað fyrir Reyni S og nú síðast Víði Garði.
Víðir hafnaði í fjórða sætinu í 3. deild karla síðasta sumar og þá varð liðið það fyrsta til þess að vinna Fótbolta.net neðrideildar bikarinn.
Björn hefur spilað 79 leiki í meistaraflokki og mun hann nú taka slaginn með þeim grænu í næstefstu deild.
„Björn Aron skrifar undir samning sem gildir út keppnistímabilið 2025. Björn er 22 ára gamall bakvörður sem gengur til liðs við Njarðvík frá Víði Garði þar sem hann var m.a. valinn leikmaður ársins hjá Víði. Þar áður var hann hjá nágrönnum okkar í Keflavík, sem og Reynir Sandgerði. Alls á Björn 79 meistaraflokksleiki á vegum KSÍ.
Björn hefur æft með Njarðvíkurliðinu undanfarnar vikur og staðið sig vel, og verður spennandi að sjá Björn í grænu treyjunni í sumar. Knattspyrnudeildin býður Birni hjartanlega velkominn til Njarðvíkur," segir í tilkynningu frá félaginu í dag.
