Pep: Mikilvægur sigur fyrir trúna

Man City var sterkari aðilinn gegn nýliðum Luton, en heimamenn í Luton tóku forystuna undir lok fyrri hálfleiks. Lærisveinar Guardiola brugðust vel við og skoruðu tvö mörk með stuttu millibili í síðari hálfleik til að snúa stöðunni við.

„Við höfum verið góðir í flestum leikjum á tímabilinu og í dag rataði boltinn í netið. Þetta var mjög mikilvægt fyrir trúna. Við viljum sýna fólki að þetta er ekki búið, við getum ennþá barist um titilinn," sagði Pep eftir endurkomusigurinn.

„Við spiluðum mjög vel í fyrri hálfleik og það var þungt högg að fá mark á okkur fyrir leikhlé. Við vorum ekki alveg jafn góðir í síðari hálfleik en skoruðum tvö mörk til að sigra. Ég er ánægður.

„Við þjáðumst fyrir þennan sigur, en ég er sáttur með spilamennskuna. Við spiluðum okkar leik."

City er í fjórða sæti ensku úrvalsdeildarinnar, fjórum stigum eftir toppliði Liverpool.

Nýliðar Luton eru í fallsæti, með 9 stig eftir 16 umferðir.