Spá þjálfara og fyrirliða fyrir Lengjudeildina: 11. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. Ægir, 47 stig
12. Völsungur, 22 stig

11. Ægir
Ægismenn úr Þorlákshöfn eru mættir aftur í Lengjudeildina eftir tveggja ára veru í 2. deild. Fyrra tímabilið í 2. deild, 2024, var ekki gott og enduðu þeir í neðri hlutanum en tímabilið í fyrra var mjög sterkt. Þeir komust upp í Lengjudeildina á óvæntan hátt sumarið 2023 þegar Kórdrengir drógu lið sitt úr keppni og voru þá í raun ekki tilbúnir í verkefnið. Núna gerir maður ráð fyrir því að þeir séu meira tilbúnir enda hafa þeir spilað í þessari deild áður og voru virkilega flottir í 2. deild í fyrra. Uppgangur Ægismanna síðustu ár hefur verið nokkuð hraður. Liðið var í 4. deild sumarið 2019 og í neðri hluta 3. deild sumarið 2020. Svo komst liðið í Lengjudeildina fyrir sumarið 2023 en það var kannski of mikið, of fljótt. Hafa menn lært af reynslunni fyrir þetta tímabil?

Þjálfarinn: Nenad Zivanovic er þjálfari Ægis og hefur verið það frá árinu 2019. Þá var liðið í 4. deild en undir hans stjórn hefur Ægir klifrað upp deildirnar, allt þar til 2023 þegar Ægismenn féllu úr Lengjudeildinni. Eftir sumarið 2023 þá skrifaði Nenad undir nýjan tveggja ára samning sem gildir út yfirstandandi tímabil. Nenad er frá Serbíu og er fæddur 1976, en hann átti farsælan feril sem leikmaður í heimalandinu, í Færeyjum og ekki síst hér á Íslandi. Hann spilaði með Breiðabliki en einnig með Fjarðabyggð og Þór. Stöðugleikinn hefur verið gífurlegur í þjálfarastarfinu í Þorlákshöfn og það er svo sannarlega styrkleiki fyrir liðið.

Álit Badda
Fótboltaþjálfarinn Baldvin Már Borgarsson er sérfræðingur Fótbolta.net fyrir Lengjudeildina. Hann rýnir í öll liðin fyrir tímabilið sem er framundan.

Koma tvíefldir til leiks
„Ægismenn koma tvíefldir til leiks eftir að hafa smakkað á Lengjudeildinni sumarið 2023, í þetta skiptið eftir að hafa unnið 2. deildina en ekki mættir sem hálf óboðnir gestir seint og síðar meir."

„Nenad hefur verið að smíða saman lið sem ætti að verða samkeppnisghæft í deildinni, síðast gaf Ægir hörku leiki þar til blaðran sprakk í restina, Nenad og Ægisliðið verður ekkert lamb að leika við, hvað þá á mottunni í Þorlákshöfn."

„Ægir mun alltaf dansa við neðri hlutann og ekkert óeðlilegt að spá þeim falli, enda klúbbur af þeirri stærðargráðu að Lengjudeildin er stór fyrir þá, þekkjandi samt umhverfið og metnaðinn í Þorlákshöfn þá verður allt lagt í sölurnar í að gera gott mót og halda sætinu í deildinni, ég treysti Nenad og Arnari Loga líka vel fyrir því að draga fram það besta úr leikmannahópnum og sækja þau stig sem þarf til."

Lykilmenn: Jordan Adeyemo og Stefan Dabetic
Ægismenn náðu í Jordan Adeyemo, mjög svo öflugan framherja, fyrir síðasta tímabili. Hann hafði verið að spila í fyrstu deild á Írlandi. Hann sýndi það strax á undirbúningstímabilinu hversu sterkur hann væri og endaði svo á því að vera besti leikmaður 2. deildar. Það var áhugi á honum frá öðrum félögum á Íslandi en hann kaus að halda tryggð við Ægi. Stefan Dabetic er reynslumikill miðvörður sem er búinn að vera hjá Ægi síðan 2019 og er ómissandi fyrir liðið. Hann er hávaxinn og sterkur hafsent frá Serbíu.

Gaman að fylgjast með: Sigurður Pétur Stefánsson
Sigurður Pétur gekk í raðir Ægis frá Kormáki/Hvöt, þar sem hann var fyrirliði, í vetur. Hann skoraði tvö mörk á síðasta tímabili, bæði í Fótbolti.net bikarnum. Annað þeirra var sérstaklega glæsilegt og kom í sigri gegn Magna á Grenivík. Hann var á bekknum í liði ársins í 2. deild í fyrra eftir gott tímabil. Núna tekur hann skrefið upp í Lengjudeildina og verður gaman að fylgjast með honum þar í nýju umhverfi.

Komnir:
Alfredo Ivan Arguello Sanabria frá Selfossi
Harley Willard frá Selfossi
Sigurður Pétur Stefánsson frá Kormáki/Hvöt
Sigurpáll Sören Ingólfsson frá KR á láni
Markús Máni Jónsson frá Víði
Kristinn Ásgeir Þorbergsson frá Árborg
Nikola Kristinn Stojanovic frá Dalvík/Reyni
Benedikt Þór Viðarsson frá Gróttu
Ómar Castaldo Einarsson frá Reyni S.
Gabriel Michael Thull frá Stokkseyri

Farnir:
Ivan Rodrigo Moran Blanco til Gíbraltar
Aron Fannar Hreinsson í Fjölni
Bilal Kamal
Jón Jökull Þráinsson
Elvar Orri Sigurbjörnsson í Selfoss (var á láni)
Guðmundur Stefánsson í Selfoss (var á láni)

Samningslausir:
Dimitrije Cokic
Kristján Daði Runólfsson

Fyrstu þrír leikir Ægis:
24. apríl, Fylkir - Ægir (tekk VÖLLURINN)
1. maí, HK - Ægir (Kórinn)
9. maí, Ægir - Grótta (GeoSalmo völlurinn)