Emma Hawkins í Val (Staðfest)

Emma er 25 ára gömul og var meðal annars markahæsti leikmaður Lengjudeildarinnar árið 2024.

Hún skoraði þá 24 mörk með FHL, sem komst upp í efstu deild í fyrsta sinn í sögu félagsins.

Emma hefur einnig spilað með Damaiense í Portúgal og Canberra United í Ástralíu.

Þetta er í annað sinn sem Valur reynir að fá Emmu. Í Uppbótartímanum á síðasta ári var greint frá því að Valur hefði reynt að fá hana í byrjun ágúst, en það gekk ekki upp.

Nú tókst það og Emma er gengin í raðir Vals. Hún verður komin með leikheimild þegar félagaskiptaglugginn opnar rétt fyrir helgi.

„Emma er leikmaður sem við höfum fylgst grannt með um nokkurt skeið. Kvennalið Vals er á uppleið og við höfum mikinn metnað fyrir framtíð þess. Við teljum að Emma muni hjálpa okkur að ná markmiðum okkar á þessu tímabili. Gæði hennar og hæfileikar fyrir framan markið munu styrkja liðið verulega og við erum afar ánægð með að fá hana í Val,“ sagði Gareth Owen, tæknilegur ráðgjafi Vals.