Markvörðurinn dæmdur í tólf leikja bann

Owono fékk að líta rauða spjaldið í leik liðanna á mánudaginn í síðustu viku þegar hann rauk út úr marki sínu til að stöðva skyndisókn og koma í veg fyrir dauðafæri sem De Miguel var við það að komast í.

Markvörðurinn fór af miklu afli í De Miguel og rak hnéð í brjóst framherjans, sem fór í kjölfarið í hjartastopp. Nokkrum klukkustundum síðar var hann úrskurðaður látinn.

Samkvæmt Athletic hefur spænska lögreglan hafið rannsókn á dauða De Miguel, en um er að ræða hefðbundið verklag þegar andlát verður af öðrum orsökum en náttúrulegum.

Spænska fótboltasambandið hefur nú úrskurðað Owono í tólf leikja bann, sem er þyngsta mögulega refsingin fyrir brot af þessu tagi.

Owono sendi frá sér yfirlýsingu á dögunum þar sem hann sagðist ganga í gegnum erfiðustu daga lífs síns. Hann dró sig jafnframt úr landsliðshópi Miðbaugs-Gíneu og er algjörlega óvíst hvort hann snúi aftur á fótboltavöllinn.