Sjáðu ævintýralega björgun Grindvíkinga á ögurstundu

Fylkismenn voru nálægt því að skora sigurmark í uppbótartíma gegn Grindavík þegar liðin áttust við í Lengjudeildinni á föstudag en Dennis Nieblas bjargaði á ævintýralegan hátt á marklínu.

„Eyþór Aron Wöhler er neitað um mark! Eyþór á skalla sem er á leiðinni inn en Grindvíkingar ná niður á línu og koma boltanum burt. Eyþór vildi eðlilega meina að boltinn væri allur inni en dómararnir ekki sammála," skrifaði Stefán Marteinn, fréttamaður Fótbolta.net, í textalýsingu frá leiknum.

Hafliði Breiðfjörð var með myndavélina í Árbænum og miðað við myndir hans þá var boltinn ekki kominn allur inn og aðstoðardómarinn Arnþór Helgi Gíslason gerði því rétt.

Leikurinn endaði með jafntefli 1-1 en björgunina má sjá hér að neðan.