Orri Steinn sjóðheitur - Orðaður við annað ítalskt félag

Orri Steinn Óskarsson er eftirsóttur af mörgum félögum; Girona hefur boðið 15 milljónir evra í hann og fjallað hefur um áhuga fleiri félaga. Atalanta og Stuttgart höfðu verið nefnd og í dag fjalla ítalskir fjölmiðlar um að Bologna gæti notað hluta af peningunum sem félagið fær frá Manchester United vegna sölunnar á Joshua Zirkzee til þess að kaupa Orra.

Íslenski landsliðsframerjinn heldur á meðan áfram að standa sig vel hjá félagi sínu FC Kaupmannahöfn. Í dag skoraði hann í æfingaleik gegn SönderjyskE en bæði lið eru á fullu í undirbúningi fyrir tímabilið í dönsku úrvalsdeildinni. Orri lék á láni hjá SönderjyskE seinni hluta tímabilsins 2022/23. Með markinu í dag fylgdi Orri á eftir tvennunni sem hann skoraði gegn Plzen á föstudag.