Galdur að spila vel og hugurinn leitar út

„Leikurinn var bara mjög góður af okkar hálfu fannst mér, við vissum að við þurftum að svara fyrir síðasta leik upp á Skaga og mér fannst við gera það virkilega vel. Gott að fá Skagamenn strax aftur til að svara þeim strax," segir Galdur en KR tapaði gegn ÍA á Akranesi fyrir rúmri viku síðan.

Galdur er sáttur með eigin frammistöðu í leiknum.

„Heilt yfir já, ég og Luke skiptum um kant og ég fékk að prófa hægri vænginn. Mér fannst það svínvirka í gær."

„Ég er ánægður að skora tvö mörk, það er alltaf gaman að skora og ég er sérstaklega sáttur með seinna markið. Það er alltaf talað um að vera mættur á fjær í þessi „auðveldu mörk" og ég er ánægður með að hafa verið klár á þessu augnabliki. Það skilar sér alltaf að vera mættur."

Eftir að Amin Cosic var seldur til Viking í Noregi hefur hlutverk Galdurs stækkað til muna.

„Mér finnst ég hafa komið vel inn í liðið frá því að Amin fór. Ég vissi sjálfur að ég gæti gert þessa stöðu að minni um leið og Amin fór og það var það sem ég ætlaði að gera. Svo er fótbolti leikur sjálfstrausts, fékk það eiginlega strax í fyrsta byrjunarliðsleik á móti Þór úti þar sem ég skorað."

Hefur þú einherja skoðun á hægri eða vinstri kantinum?

„Maður er meira í boltanum vinstra megin þar sem við reynum að fara með fleiri menn vinstra megin og mér finnst við vera orðnir mjög góðir í því. Mér finnst persónulega betra að spila vinstra megin en það er ekkert mál að breyta til og fara á hægri eins og í gær."

Galdur var fenginn í KR frá danska félaginu Horsens. Hann er uppalinn hjá ÍBV og Breiðabliki og var á mála hjá FC Kaupmannahöfn áður en hann fór til Horsens. Leitar hugurinn aftur út?

„Hugurinn leitar alltaf út en mér finnst mjög mikilvægt að það sé rétt lið, ekki bara fara út til að fara út. Ég hef upplifað það að vera úti og líða ekki vel, þannig mér finnst mjög mikilvægt að velja rétt lið fyrir mig og taka tíma í það."

Fjórir leikir eru eftir af tímabilinu. KR er í 2. sæti sem stendur, sex stigum frá Víkingi og tveimur stigum fyrir ofan Fram en bæði lið eiga leik til góða á KR. Hvað vill Galdur fá út úr lokaleikjunum?

„Fjórir síðustu leikirnir í deildinni snúast bara um að klára deildina vel. Við skuldum sjálfum okkur að klára deildina almennilega og klára mjög fínt tímabil," segir Galdur sem á að baki einn leik með U21 landsliðinu og alls 19 leiki fyrir yngri landsliðin.