2. deild kvenna: Vestri vann toppslaginn

Vestri og Einherji áttust við í eina leik dagsins í 2. deild kvenna og komust heimakonur í tveggja marka forystu í fyrri hálfleik.

Raniyah Burton skoraði mörk Ísfirðinga með átta mínútna millibili og tókst gestunum að minnka muninn í síðari hálfleik. Þar var Claudia Merino á ferðinni á 58. mínútu, en það dugði ekki til.

Einherja tókst ekki að jafna metin svo lokatölur urðu 2-1 og eru liðin jöfn á toppi deildarinnar með 24 stig eftir 10 umferðir.

Þetta þýðir að Fjölnir og Fylkir, sem eiga 22 stig og leik til góða, geta tekið toppsætið með sigri þegar liðin stíga til sviðs seinnipart mánudags. Afturelding er einnig með í fimm liða toppbaráttu sem lofar virkilega góðu, þremur stigum á eftir toppliðunum og með leik til góða gegn Fylki í toppbardaga.