Everton fær tugmilljóna lán frá verðandi eigendum

Everton á í fjárhagsvandræðum og hefur 777 Partners ákveðið að veita félaginu lán sem er tugmilljóna punda virði til að hjálpa við reksturinn næstu mánuðina.

Everton er að byggja nýjan leikvang sem mun auka verðmæti félagsins til muna í framtíðinni og eru stuðningsmenn ánægðir með að losna við Moshiri.

Það er enn mikil vinna framundan til að ganga frá eigendaskiptum en ljóst er að 777 Partners er reiðubúið til að skuldbinda sig með þessu láni.

Everton hefur verið rekið í tapi síðustu fimm ár og gæti endað á að borga 760 milljónir punda fyrir nýja leikvanginn sinn. Félagið þarf utanaðkomandi aðstoð til að enda ekki í gjaldþroti.

Everton er aðeins komið með eitt stig eftir fimm leiki á úrvalsdeildartímabilinu eftir að hafa rétt bjargað sér frá falli á síðustu leiktíð.