Lengjudeild kvenna: Draumur Hauka enn á lífi

Haukar lentu ekki í erfiðleikum með botnlið Völsungs er liðin mættust í Lengjudeild kvenna í dag.

Hildur Karítas Gunnarsdóttir og Vienna Behnke skoruðu tvö mörk á fyrsta stundarfjórðungnum. Vienna gerði út um leikinn í síðari hálfleik þegar hún skoraði þriðja mark Hauka.

Haukar þurftu sigurinn til að halda í við Keflavík í baráttunni um 2. sæti deildarinnar. Keflavík er með fjögurra stiga forystu þegar fjórar umferðir eru eftir en liðin eiga eftir að mætast í tveimur innbyrðisviðureignum.

Haukar eiga þó einnig eftir að spila útileik við topplið Tindastóls.