Óskar Hrafn Þorvaldsson, þjálfari Breiðablik
Grótta og Breiðablik mættust á Vivaldivellinum á Seltjarnarnesi í Pepsí Max-deild karla í kvöld og leiknum lauk með 1-0 sigri Blika en Thomas Mikkelsen skoraði eina mark leiksins af vítapunktinum.
Lestu um leikinn: Grótta 0 - 1 Breiðablik
„Já, ég held að það sé alveg óhætt að segja það, þetta voru erfiðar 90 mínútur fyrir okkur.Við vorum ekki góðir og áttum kannski ekkert endilega skilið að vinna þennan leik en við tökum stigin." voru fyrstu viðbrögð Óskars Hrafns þjálfara Blika eftir leik
Blikarnir voru ekki góðir sóknarlega í kvöld en hvað fer úrskeiðis?
„Við gætum örugglega spjallað lengi saman um það en kannski fyrst og síðast við vorum hægir, spiluðum ekki fram á við, notfærðum okkur ekki breiddina á vellinum og það vantaði upp á ákvörðunartökurnar hjá okkur. Stutta svarið er bara að þetta var hreint og beint lélegt."
Óskar Hrafn hrósaði Gróttuliðinu eftir leik
„Ég ætla ekki að taka neitt af Gróttuliðinu, þeir vörðust vel og það var á brattana að sækja þegar þeir voru orðnir tíu og þá voru þeir enþá þéttari og við áttum í erfiðleikum að finna leið í gegnum þá og bara hrósa þeim fyrir það."
„Mér fannst þetta vera rautt spjald, ég er svosem ekki dómari en þetta leit úr fyrir mér að Gísli Eyjólf er að sleppa einn í gegn og hann hreinlega sparkar hann niður og er aftasti maður og það var ekkert sem Gróttuliðið gat gert í því þegar Gísli Eyjólfsson er komin á ferðina. Ég held hann dæmt rétt í þetta skipti.
Viktor Karl Einarsson snéri aftur til baka eftir löng meiðsli í Blikaliðið í kvöld þegar hann kom inn á sem varamaður í byrjun seinni hálfleik og er gleðiefni fyrir Blika að hann sé mættur
„Já það er auðvitað mjög jákvætt að Viktor Karl er kominn til baka, hann er mjög öflugur og búin að vera lengi frá og það er eitt af því jávæða sem við tökum úr þessum leik."
Framundan er Evrópuverkefni hjá Breiðablik en liðið mætir Rosenborg og Óskar var spurður hvernig staðan á hópnum væri svona strax eftir leikinn í kvöld.
„Ég held það séu bara nánast allir heilir, ég á svo sem ekki von á öðru eftir helgina að þá verða allir mættir, þetta er leikur sem menn hafa beðið eftir lengi og alla langar til að spila þannig ég á ekki von á öðru en við verðum klárir í það verkefni."
Viðtalið í heild má sjá í sjónvarpinu hér að ofan.
