Spá Fótbolta.net fyrir Bestu kvenna: 2. sæti

Spáin:
1. ?
2. FH, 92 stig
3. Víkingur R., 74 stig
4. Stjarnan, 70 stig
5. Þróttur R., 69 stig
6. Valur, 61 stig
7. Þór/KA, 43 stig
8. ÍBV, 34 stig
9. Grindavík/Njarðvík, 21 stig
10. Fram, 17 stig

Um liðið: FH gengur inn í nýtt tímabil í Bestu deild kvenna sem eitt allra sterkasta lið landsins og er spáð 2. sæti. Uppgangurinn í Kaplakrika síðustu ár hefur verið gríðarlegur og liðið hefur stigið skref fyrir skref nær toppnum. Á síðasta tímabili náðu þær sínum besta árangri til þessa þegar liðið endaði í 2. sæti bæði í deild og bikar, og var á köflum ekki langt frá því að veita Breiðabliki alvöru samkeppni um titilinn. FH hefur skapað sér skýra leikímynd þar sem skemmtilegur og áræðinn fótbolti er í fyrirrúmi, sem hefur gert liðið að einu því mest spennandi í deildinni. Verkefnið framundan er þó krefjandi: Að halda áfram þessari þróun og brúa bilið upp í efsta sætið. FH er ekki lengur aðeins á uppleið, þær eru komnar í stöðu þar sem raunhæft er að gera kröfu um titilbaráttu. Ef liðið nær að byggja ofan á þann sterka grunn sem hefur verið lagður og heldur áfram að þróa sinn leikstíl, gæti Kaplakriki orðið heimavöllur Íslandsmeistara í náinni framtíð.

Þjálfararnir: Bræðurnir Guðni og Hlynur Eiríkssynir stýra áfram verkefninu í Kaplakrika. Þeir vinna afskaplega vel saman og hefur það sést á árangri liðsins á undanförnum árum. Guðni tók við sem aðalþjálfari FH árið 2018 og er með mikla reynslu í starfinu. Hlynur kom svo inn í teymið tímabilið 2020. Þeir eru báðir með mikið FH-hjarta og brenna fyrir félagið. Undir þeirra stjórn hefur FH byggt upp skemmtilegan leikstíl og góðan grunn fyrir framhaldið. Núna er spurning hvort þeir geti tekið næsta skref í tröppunni og skilað titlum í hús. Þeir eru allavega mjög metnaðarfullir og vilja allt það besta fyrir félagið sitt.

Álit Magga
Fótboltaþjálfarinn Magnús Haukur Harðarson er sérfræðingur Fótbolta.net í Bestu deild kvenna. Hann rýnir í öll liðin fyrir tímabilið sem er framundan. Magnús verður með hlaðvarpsþáttinn Uppbótartímann á Fótbolta.net í sumar þar sem farið verður yfir kvennaboltann á Íslandi á mannamáli.
Síðasta skrefið
„Mínir heimildarmenn segja mér að FH liðið hafi aldrei verið eins góðu standi og núna og allir leikmenn eru heilir fyrir fyrsta leik."

„Sterkur kjarni í bland við unga og efnilega leikmenn ásamt sterkum erlendum leikmönnum. Aldis er að snúa aftur í markið og var það mögulega ástæðan fyrir því að FH vann ekki titil á síðustu leiktíð."

„Varnarleikurinn þarf að vera betri og liðið þarf að sýna meiri aga inn á eigin vallarhelming með boltann."

„Eftir að hafa tapað bikarúrslitaleiknum og endað í öðru sæti á þetta FH lið bara eftir að taka síðasta skrefið."

Lykilmenn: Katla María Þórðardóttir og Ída Marín Hermannsdóttir
Katla María kom heim úr atvinnumennsku í fyrra eftir að hafa leikið með Örebro í Svíþjóð. Hún spilaði mjög vel með FH í fyrra og er núna tekin við fyrirliðabandinu. Hún verður leiðtogi fyrir liðið í sumar og þarf að eiga gott sumar inn á vellinum til þess að FH verði í baráttunni um titlana. Ída Marín verður þá í stóru hlutverki í liði FH í sumar en hún hefur tekið frábær skref fram á við síðustu misseri. Ída Marín er komin inn í A-landsliðshópinn og hefur fengið þar gott hlutverk og það segir til um þann stað sem hún er á í dag. Hún fer þá ekki út í háskóla á miðju sumri - eins og síðustu sumur - en það gæti verið að hún fari út í atvinnumennsku fljótlega ef hún heldur rétt á spilunum.

Gaman að fylgjast með: Ingibjörg Magnúsdóttir
Thelma Karen Pálmadóttir var saga sumarsins í Kaplakrika á síðasta ári. Saga þessa sumars gæti verið Ingibjörg Magnúsdóttir. Ingibjörg er gríðarlega efnilegur leikmaður sem kemur inn á kantinn með mikinn hraða, kraft og leikni. Hún hefur spilað fyrir yngri landslið Íslands og það er aldrei að vita nema hún fylgi í fótspor Thelmu í sumar og springi gjörsamlega út. Fylgist allavega vel með þessum leikmanni í sumar.

Komnar:
Mackenzie Smtih frá Fram
Elín Björg Norðfjörð Símonardóttir frá Haukum
Nia Christopher frá Bandaríkjunum
Helena Errington frá Bandaríkjunum

Farnar:
Thelma Karen Pálmadóttir í Häcken
Arna Eiríksdóttir í Vålerenga
Elísa Lana Sigurjónsdóttir til Kristianstad
Maya Hansen
Macy Elizabeth Enneking
Margrét Brynja Kristinsdóttir í Val
Valgerður Ósk Valsdóttir í Hauka
Harpa Helgadóttir í Fram (lán)



Fyrstu fimm leikir FH:
25. apríl, Þór/KA - FH (VÍS völlurinn)
30. apríl, Þróttur R. - FH (AVIS völlurinn)
6. maí, FH - Grindavík/Njarðvík (Kaplakrikavöllur)
10. maí, Stjarnan - FH (Samsungvöllurinn)
19. maí, FH - ÍBV (Kaplakrikavöllur)

Spámennirnir: Alexander Tonini, Alexandra Bía Sumarliðadóttir, Anton Freyr Jónsson, Elíza Gígja Ómarsdóttir, Guðmundur Aðalsteinn Ásgeirsson, Kári Snorrason, Magnús Haukur Harðarson, Snæbjört Pálsdóttir, Sverrir Örn Einarsson, Sæbjörn Þór Þórbergsson Steinke.