Heimild: Aftonbladet 

Svíar voru ekki tilbúnir í löngu innköstin hennar og gerði Elín Metta Jensen jöfnunarmark Íslands eftir eitt slíkt.

Aftonbladet setti sig í samband við Sveindísi Jane og spurði hvort það hafi komið henni á óvart að Svíar hafi ekki verið tilbúnir í innköstin sem ollu þeim miklum usla.

„Já, ég var smá hissa en það gæti verið að teymið þeirra hafi ekki vitað að ég átti að byrja leikinn. Þetta er í fyrsta sinn sem ég er í landsliðinu og kannski skoðuðu þau ekki minn leikstíl," svaraði Sveindís.

„Ég hef alltaf notað þessi innköst með yngri landsliðunum en ég skil að þau vissu ekki af þessu því ég er ungur leikmaður. Mér finnst líklegt að þau geri eitthvað til að koma í veg fyrir þetta í næsta leik.

„Ég uppgötvaði að ég gat tekið þessi löngu innköst þegar ég var eitthvað um 12 ára og hef notað þau síðan. Þau virka eins og leynivopn og geta breytt leikjum ef þau eru framkvæmd á réttum augnablikum."

Ísland heimsækir Svíþjóð á þriðjudaginn í stórleik og hálfgerðum úrslitaleik um toppsæti undanriðilsins fyrir EM á næsta ári. Sveindís, sem er aðeins 19 ára, hefur verið meðal bestu leikmanna tímabilsins í Pepsi Max-deild kvenna og vonast til að komast á atvinnumannasamning erlendis í framtíðinni.

„Ég væri mikið til í að komast til stærra félags í einni af stóru deildunum."