Fyrsta leik kvöldsins í Borgunarbikar karla var að ljúka, en Breiðablik heimsótti 4. deildarlið Kríu í 32-liða úrslitum.

Fyrir leikinn var búist við öruggum sigri Blika, en staðan í hálfleikv var markalaus. Sumir voru því farnir að spyrja sig hvort Blikar myndu apa eftir KR-ingum sem duttu út fyrir Selfyssingum í gær.

Það gerðist hins vegar ekki því Blikar hrukku í gang í seinni hálfleik, ef svo má segja.

Guðmundur Atli Steinþórsson kom þeim á bragðið snemma í seinni og tíu mínútum eftir mark hans skoraði hinn efnilegi Ágúst Eðvald Hlynsson, en hann er fæddur árið 2000.

Arnþór Ari Atlason innsiglaði svo sigurinn undir lokin með þriðja Blika og þar við sat. 3-0 sigur staðreynd, en leikmenn Kríu geta verið sáttir með frammistöðu sína í leiknum.