Sverrir Ingi í liði mánaðarins í dönsku deildinni

Íslenski landsliðsvarnarmaðurinn Sverrir Ingi Ingason hefur verið valinn í lið mánaðarins í dönsku úrvalsdeildinni.

Sverrir er einn besti varnarmaður deildarinnar og skoraði eitt af mörkum Midtjylland í 4-1 sigri gegn Silkeborg í síðustu umferð.

Það var hans fyrsta mark fyrir félagið en Sverrir, sem er þrítugur, hefur leikið tíu deildarleiki.

Midtjylland er ósigrað í tíu leikjum í röð og hefur verið á miklu flugi eftir erfiða byrjun. Liðið er í öðru sæti með 33 stig, jafnmörg stig og topplið FC Kaupmannahafnar en lakari markatölu.