Spáin:
1. ?
2. ?
3. ?
4. ÍA, 102 stig
5. KR, 90 stig
6. Valur, 88 stig
7. KA, 74 stig
8. Fram, 67 stig
9. FH, 46 stig
10. Þór, 36 stig
11. ÍBV, 22 stig
12. Keflavík, 17 stig

Um liðið: Síðasta tímabil var nokkuð mikil rússíbanareið fyrir Skagamenn. Menn voru borubrattir áður en leiktíðin hófst en fljótlega fór andrúmsloftið að súrna. Um mitt sumar sat ÍA á botni deildarinnar og þá var ákveðið að ráðast í þjálfarabreytingar. Lárus Orri Sigurðsson, sem hafði getið sér gott orð sem sérfræðingur í kringum Bestu deildina í sjónvarpinu, tók við liðinu og þétti raðirnar. ÍA bjargaði sér að lokum þægilega frá falli en vonbrigðin voru samt til staðar þar sem væntingarnar fyrir sumarið voru miklar. Í vetur hefur ÍA farið hafmförum á leikmannamarkaðnum og aftur eru væntingarnar komnar upp í hæstu hæðir. Núna er að sjá hvort menn mæti almennilega til leiks þetta sumarið því Skagamönnum dreymir um að sjá sitt lið aftur í Evrópukeppni eftir langa fjarveru þaðan.

Þjálfarinn: Það kom mörgum á óvart þegar Lárus Orri Sigurðsson var ráðinn þjálfari ÍA um mitt síðasta sumar enda hafði hann ekki þjálfað þá í sjö ár um það bil. Mikið var rætt og ritað um Jóhannes Karl Guðjónsson þegar Jón Þór Hauksson var látinn taka pokann sinn en það tókst ekki að landa honum frá Danmörku. Því var Lárus Orri ráðinn og hann sýndi hvers megnugur hann er. Lárus Orri ólst upp á Akranesi og lék með yngri flokkum ÍA við góðan orðstír allt þar til hann flutti til Akureyrar á unglingsaldri. Þar lék hann með meistaraflokki Þórs í nokkur ár. Hann átti magnaðan atvinnumannaferil í Englandi sem spannaði 10 ár þar sem hann lék með Stoke og WBA, bæði í Championship deildinni og Premier League. Lárus, sem er harður í horn að taka, spilaði þá 42 landsleiki fyrir Íslands hönd og þjálfaði Þór og KF áður en hann tók við ÍA eftir gott frí úr þjálfunarbransanum.

Styrkleikar: ÍA hefur bætt við sig miklum gæðaleikmönnum í félagaskiptaglugganum og á blaði er leikmannahópur Skagamanna orðinn mjög álitlegur. Það hefur bæst mikil reynsla við hópinn og eru að koma inn leikmenn með ferla í atvinnumennsku og Íslandsmeistaratitla á bakinu. Það er greinilegt að menn eru að leggja mikið í þetta á bak við tjöldin á Akranesi og er það mikill styrkleiki hversu mikill metnaðurinn er orðinn. Þessir nýju leikmenn sem eru komnir inn ættu að geta lyft boltanum á Akranesi upp á næsta plan. Það var mikil samheldni í liðinu eftir að Lárus Orri tók við og það er mikilvægt fyrir Skagamenn að halda henni í hámarki þegar gengið er inn í nýtt sumar.

Veikleikar: Menn voru talaðir upp til skýjanna fyrir síðasta tímabil og það virðist hafa haft áhrif á einhverja leikmenn innan hópsins og kannski einhverja utan hans líka. Menn verða að vera á tánum og halda sér á jörðinni þó liðinu sé spáð góðu gengi. Pressan á Skaganum er mikil og það er talað um fátt annað en fótbolta í bænum, en það getur pressa fylgt því. Liðið byrjaði síðasta tímabil skelfilega og verða menn að bæta upp fyrir það í sumar. Það var mikið talað um það í fyrra að Viktor Jónsson saknaði þess að hafa Hinrik Harðarson sér við hlið og það vantar kannski aðeins meira fútt í fremstu stöðurnar. Lárus Orri gerði frábærlega þegar hann tók við liðinu á síðasta tímabili en sem þjálfari hjá liði sem ætlar sér að vera í Evrópubaráttu, og jafnvel meira, þá er hann ákveðið spurningamerki. Hann á eftir að sanna sig almennilega.

Lykilmenn: Rúnar Már Sigurjónsson og Gísli Eyjólfsson
Rúnar Már steig heldur betur upp þegar ÍA þurfti á honum að halda síðasta sumar. Hann var mikið meiddur tímabilið á undan en kom sterkur inn á síðustu leiktíð og var sérlega góður þegar hann færðist aftar í miðvörðinn seint á tímabilinu. Með mikla reynslu og mikil gæði sem hjálpar Skagaliðinu talsvert. Það var þá risastórt þegar ÍA krækti í Gísla Eyjólfsson eftir að hafa reynt það lengi. Gísli var einn allra besti leikmaður Bestu deildarinnar í mörg ár áður en hann fór út í atvinnumennsku til Svíþjóðar. Hann hefur spilað lengst af á sínum ferli með Breiðabliki en mætir núna gulur og glaður inn í þetta mót.

Gaman að fylgjast með: Gabríel Snær Gunnarsson
Hann verður því miður ekki lengi í Bestu deildinni í sumar þar sem hann er á leið til Svíþjóðar, til Elfsborg. Þessi gríðarlega efnilegi sóknarmaður hefur verið iðinn við kolann á undirbúningstímabilinu og kemur til með að fá eitthvað hlutverk áður en hann fer erlendis. Hann hefur ekk langt að sækja markaskóna því faðir hans er fyrrum landsliðsmaðurinn Gunnar Heiðar Þorvaldsson.

Spurningarnar: Læra menn af síðasta tímabili? Verður pressan of mikil? Bætist Tryggvi Hrafn við hópinn?

Völlurinn: ELKEM völlurinn á Akranesi er einn af þremur völlum deildarinnar sem er með náttúrulegt gras. Það er ótrúleg saga þarna og margir bikarar sem hafa farið á loft, en það er alltof langt síðan síðast. Þarna hafa unnist Íslandsmeistaratitlar og stemningin getur verið mögnuð ef það gengur vel.

Komnir:
Gísli Eyjólfsson frá Halmstad
Guðmundur Þórarinsson frá Noah
Böðvar Böðvarsson frá FH
Rafael Máni Þrastarson frá Fjölni
Markús Páll Ellertsson frá Ítalíu
Hilmar Elís Hilmarsson frá Fjölni (var á láni)

Farnir:
Albert Hafsteinsson
Marko Vardic til Grikklands
Hlynur Sævar Jónsson í Fylki
Guðfinnur Þór Leósson í Fylki
Jonas Gemmer til Danmerkur
Jón Sölvi Símonarson í Breiðablik (var á láni)
Ármann Ingi Finnbogason seldur til Víkings (var á láni hjá Grindavík)
Arnleifur Hjörleifsson alfarið í Njarðvík (var á láni)
Ingi Þór Sigurðsson seldur til Grindavíkur (var á láni)
Árni Salvar Heimisson (var á láni hjá Grindavík)

Leikmannalisti:
1. Árni Marínó Einarsson (m)
12. Logi Mar Hjaltested (m)
3. Johannes Bjorn Vall
5. Baldvin Þór Berndsen
7. Haukur Andri Haraldsson
8. Guðmundur Þórarinsson
9. Viktor Jónsson
10. Steinar Þorsteinsson
11. Gísli Eyjólfsson
13. Erik Tobias Sandberg
15. Gabríel Snær Gunnarsson
16. Rúnar Már Sigurjónsson
17. Gísli Laxdal Unnarsson
18. Rafael Máni Þrastarson
20. Ísak Máni Guðjónsson
21. Böðvar Böðvarsson
22. Ómar Björn Stefánsson
23. Daníel Michal Grzegorzsson
26. Matthías Daði Gunnarsson
27. Brynjar Óðinn Atlason
28. Birkir Hrafn Samúelsson
32. Jón Breki Guðmundsson
33. Arnór Valur Ágústsson
66. Jón Gísli Eyland Gíslason
87. Styrmir Jóhann Ellertsson
Markús Páll Ellertsson
Hilmar Elís Hilmarsson
Birkir Breki Burknason

Fyrstu fimm leikir ÍA:
12. apríl, Fram - ÍA (Lambhagavöllurinn)
17. apríl, Breiðablik - ÍA (Kópavogsvöllur)
22. apríl, ÍA - KA (ELKEM völlurinn)
27. apríl, Víkingur R. - ÍA (Víkingsvöllur)
3. maí, ÍA - Stjarnan (ELKEM völlurinn)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.

Athugasemdir