Inter vann pólska liðið Lech Poznan 1-0 samanlegt í forkeppninni en það eru úrslit sem komu flestum mjög á óvart. Í viðtalinu lýstu þeir upplifuninni í Póllandi.

„Það er erfitt að finna lýsingarorð yfir þetta. Það var eiginlega algjört brjálæði að fara þarna og tryggja okkur sigur í einvíginu. Þeir voru um 80% með boltann en frammistaða allra í okkar liði var hetjuleg. Ég fæ gæsahúð þegar ég hugsa um andrúmsloftið sem var á vellinum," segir Præst og Rauschenberg tekur undir:

„Við höfum verið góðir en lukkan hefur einnig verið með okkur í liði. Einnig höfum við verið klókir."

Vissum ekki hvað var í gangi
Leikmenn Stjörnunnar voru í flugi þegar liðið dróst á móti Inter og fengu þeir fréttirnar við lendingu.

„Við tveir sátum fremst í flugvélinni og allt liðið var í sætunum fyrir aftan. Við vorum að lenda í Kaupmannahöfn og svo allt í einu heyrast rosaleg læti og fagnaðarlæti. Við vissum ekkert hvað var í gangi, við snérum okkur við og spurðum og þá var bara kallað 'Inter! Inter'"

Michael Præst hefur verið algjör lykilmaður hjá Stjörnunni. „Hann hefur verið frábær fyrir liðið og er límið á miðjunni," segir Rauschenberg en útlit er fyrir að Præst hafi slitið krossbönd á vinstra hné og spili ekki meira á tímabilinu. Er það mikið áfall fyrir Garðabæjarliðið.

Fótbolti ekki skemmtilegur ef þú tapar
Talað hefur verið um að Stjörnuliðið hafi breytt um leikstíl og sé ekki eins áhorfendavænt og það var. Skipulagið sé meira og ekki sama rússibanareið og áður.

„Fótbolti snýst um að vinna. Hann er ekki skemmtilegur ef þú tapar. Fólk er að tala um að Stjörnuliðið hafi spilað svo skemmtilegan bolta fyrir nokkrum árum og mörg mörk voru skoruð í leikjunum. Mér er sama um hvernig fótboltinn er spilaður svo lengi sem sigrar vinnast. Þjálfarateymið á hrós skilið fyrir að halda okkur á jörðinni," segir Præst sem er með persónuleg markmið sem ná lengra en Pepsi-deildin.

„Ég fékk tilboð frá öðrum félögum, bæði hér á landi og erlendis fyrir tímabilið. Ég vildi taka þátt í því sem við í Stjörnunni hófum í fyrra með því að komast í Evrópukeppni. Ég vildi klára það verkefni. Ég hef metnað fyrir því að fara annað í atvinnumennsku en maður veit ekki hvað framtíðin ber í skauti sér."

Hægt er að hlusta á viðtalið í heild sinni í spilaranum hér að ofan en þar ræða þeir meðal annars nánar um komandi leiki við Inter.