„Við erum að gera þetta á annan hátt en liðin sem eru í Evrópukeppni, við gerum þetta kannski svipað og Breiðablik en lið eins og KR og FH eru að pikka upp stærstu nöfnin á markaðnum. Okkar upplegg er að gera blöndu með heimamönnum, ungum strákum og góðum útlendingum. Við vonum að þessi uppskrift virki til að við náum okkar markmiðum en það er alltaf erfiðara og erfiðara að berjast á móti þessum liðum," segir Ágúst.

„Svona þróun er að verða allstaðar, ekki bara á Íslandi. Það eru yfirleitt sömu meistararnir en þegar það kemur að því að Fjölnir vinnur Íslandsmeistaratitil þá segi ég að hin félögin megi fara að vera sig. Það er allt til staðar í þessu félagi. Við munum komast í Evrópukeppni og það verður slegist um að komast í Fjölni."

„Það þarf að sparka í nokkra til að koma þessu liði á þann stað að það vinni fyrsta titilinn. Þá verður meðbyr og þá verður erfitt að stöðva Fjölni."

Ágúst fer ekkert leynt með það að hann telji að Fjölnir geti komist í hóp allra sterkustu liða landsins.

„Það er ekkert öðruvísi. Breiðablik varð Íslandsmeistari 2010 og bikarmeistari árið áður. Þeim þyrstir í titla og eru í Evrópukeppni núna og geta byggt ofan á það. Við erum að bíða eftir þessum árangri og vinnum að honum hægt og rólega," segir Ágúst í viðtalinu sem heyra má í heild sinni í spilaranum hér að ofan.

Í viðtalinu ræðir Ágúst einnig um Ólaf Pál Snorrason, Bose-mótið, leikmannamál, Þórð Ingason og fleira.

Sjá einnig:
Hlustaðu á útvarpsþáttinn í heild sinni