„Gríðarlega ánægður með strákana. Við gerðum töluvert af breytingum, það komu ferskar lappir inn og þeir sýndu góðan leik og þessi leikur var eiginlega aldrei í hættu að mínu mati,“ sagði Ásmundur Arnarson eftir 2-0 sigur sinna manna í Fram gegn HK í kvöld.
Framarar voru sterkari í kvöld þó að HK hafi e.t.v. reynt að spila boltanum meira eftir jörðinni. „Uppleggið hjá okkur fór svolítið út um gluggann út af aðstæðum. Það var svolítill vindur á okkur þannig að við þurftum að þétta raðirnar svolítið og ná tökum á leiknum þannig. HK-ingar eru grimmir og með fínt lið, þannig að við þurftum að vera klárir í að mæta þeim og spila svo okkar bolta.“
Stigasöfnun Fram hefur verið rýr í upphafi Inkasso deildarinnar en Ási er þó ánægður með sitt lið. „Við erum ekkert óánægðir með liðið í upphafi móts. Við áttum alveg von á að við yrðum pínu lengi í gang. Margir komu rétt fyrir mót og við erum búnir að spila tvo erfiða útileiki fyrir norðan og ná í stig í öðrum þeirra og vorum óheppnir að vinna ekki síðasta heimaleik, þannig að við erum ekkert ósáttir við liðið. Við þurfum bara að bæta örlítið í og þá detta stigin inn.
Athugasemdir