Matthías fagnar í búningi Rosenborg.
Matthías Vilhjálmsson og félagar í Rosenborg hafa algjöra yfirburði í norsku úrvalsdeildinni en liðið náði þó ekki að komast í riðlakeppni Evrópudeildarinnar. Matthías Vilhjálmsson, leikmaður Rosenborg, var í viðtali í útvarpsþættinum Fótbolti.net á X-inu í gær.
„Það hefur gengið mjög vel í deildinni hjá okkur og þetta hefur eiginlega verið of létt. Það var þó mikil vonbrigði hjá okkur að ná ekki að komast í riðlakeppni í Evrópukeppninni," segir Matthías. „Það er gaman að vera í félagi eins og Rosenborg þar sem alltaf er keppt um titla."
Matthías hefur byrjað 13 leiki á tímabilinu og komið 8 sinnum inn sem varamaður. Er hann sáttur við sitt hlutskipti?
„Ég er nokkuð sáttur. Ég hefði samt viljað byrja fleiri Evrópuleiki og ég hef aðeins byrjað fimm leiki sem sóknarmaður. Það er búið að henda mér út um allt, á kantinn, sem djúpum á miðju og miðvörður. Ég er notaður í margar stöður og það er kannski þreytandi til lengdar en fínt að því leyti að þá fæ ég að spila meira."
Viðtalið má heyra í spilaranum hér að ofan en þar talar Matthías meðal annars um stöðu sína varðandi landsliðið.
Athugasemdir
