Theódór Elmar Bjarnason var í byrjunarliði Elazigspor sem þurfti að sætta sig við tap í tyrknesku 1. deildinni í dag.

Elazigspor heimsótti Altinordu og það er óhætt að segja að Elmar og félagar hafi ekki fengið neina óskabyrjun. Þeir lentu undir þegar nokkrar sekúndur voru búnar af leiknum.

Baris Alici skoraði fyrsta markið og hann var aftur á ferðinni eftir 20 mínútur og staðan 2-0 fyrir heimamenn.

Alpaslan Östurk klóraði í bakkann fyrir Elmar og félaga en lengra komust þeir ekki og lokatölur 2-1.

Elazigspor er í tíunda sæti deildarinnar, þremur stigum frá umspilinu.