Öllum leikjum dagsins í B-deild Lengjubikarsins er nú lokið.

Í riðli 1 vann Kári stórsigur á Berserkjum á Víkingsvelli en liðin enduðu á sitthvorum enda 3.deildarinnar síðastliðið sumar, Kári á toppnum og Berserkir á botninum, en liðin eru í sömu stöðu í riðlinum nú.

Sindri frá Höfn í Hornafirði og Vesturbæingarnir í KV mættust á Selfossi og skipust á jafnan hlut, 1-1. Þetta var fyrsta stig Sindramanna í mótinu.

Tveir leikir fóru fram í riðli 4. Leiknir Fáskrúðsfirði og Völsungur mættust í Fjarðabyggðahöllinni. Völsungur komst í 0-2 en heimamenn jöfnuðu. Stuttu eftir það misstu gestirnir mann útaf með rautt spjald en það kom ekki að sök þar sem þeir skoruðu sigurmarkið í lokin og unnu 2-3 sigur.

Þá vann Einherji 0-1 sigur á Hetti á Fellavelli á Egilsstöðum þar sem varamaðurinn Númi Kárason skoraði eina mark leiksins undir lok leiks.