„Þetta var alvöru leikur. Það var smá taugaspenna hjá okkur fyrstu 15-20-25 mínúturnar," sagði Davíð Þór Viðarsson fyrirliði FH eftir 3-0 sigur á Þrótti í opnunarleik Pepsi-deildarinnar í dag.
Lestu um leikinn: Þróttur R. 0 - 3 FH
„Þetta var fyrsti leikur í móti og fiðringur í mönnum. Það er mismunandi hvernig það fer í menn. Það fór kannski ekki nógu vel í okkur en þetta endaði vel," sagði Davíð sem sjálfur lagði grunninn að fyrsta marki FH með frábærri sendingu inn fyrir á Steven Lennon.
„Já hún var góð. Ég hitti hann vel og Lenny er góður í þessu og þegar hann er með smá pláss fyrir aftan vörnina þarf sendingin ekkert að vera frábær. Hann er mjög fljótur og klókur og kláraði þetta frábærlega," sagði Davíð en eru FH-ingar of þungir á sér?
„Það leit kannski þannig út í dag. Ég veit það ekki, ég hef nú aldrei verið beint léttur á mér," sagði Davíð. „Við vorum ekki jafn léttir á okkur og þegar við erum upp á okkar besta en ég held að það sé svosem allt í lagi að þú sért ekki 100% í toppspilformi í byrjun móts og gott að vinna sig í það."
Nánar er rætt við Davíð Þór í sjónvarpinu að ofan en þar er hann meðal annars spurður út í stemmninguna í stúkunni og umgjörð Þróttar sem var til fyrirmyndar.
„Það var virkilega góð stemmning og fólk var mætt snemma á völlinn sem er alltaf gaman. Það er alltaf gaman að kötturunum og flottir jakkarnir þeirra. Mér fannst okkar menn í Mafíunni líka mjög öflugir og var Star Wars Stormtrooperinn ekki flottur?"
Athugasemdir
