„Maður er orðlítill. Ég veit ekki hvað maður á að segja," sagði Arnór Ingvi Traustason eftir 1-1 jafnteflið gegn Katar í vináttuleik í kvöld.

Ísland leiddi 1-0 í hálfleik þrátt fyrir að hafa átt í erfiðleikum í fyrri hálfleiknum. „Þetta var með því lélegra sem ég hef séð og ég hef tekið þátt í. Við vorum stálheppnir."

„Við vorum alltof opnir í fyrri hálfleik. Við vorum galopnir á miðjunni og þetta var mjög lélegt."

Ísland prófaði að spila með fimm manna vörn í síðari hálfleiknum.

„Í seinni hálfleik náðum við að leggjast til baka og þeir sköpuðu sér ekki mikið þá og komust ekki mikið í gegnum okkur. Við vorum að prófa þetta og tíminn í það er akkúrat núna."