Vagn hefur merkt Nissan Micra bifreið sína vel í litum Víkings frá Ólafsvík en framan á bílnum er merki félagsins áberandi.

,,Ég hef nú verið með þetta í maganum í nokkur ár að merkja vinnubílinn minn og það var lengi meiningin að klæða hann í rauðan Manchester búning en það verður að bíða betri tíma," sagði Vagn við Fótbolta.net.

,,Fyrir síðasta tímabil þegar Víkingur spilaði sitt fyrsta tímabil í efstu deild þá var ég fenginn í að mála merkingu við Ólafsvíkurvöll og þá læddist þessi hugmynd að mér. Núna hafði ég tíma og dreif í þessu."

,,Áhuginn fyrir boltanum hér í Ólafsvík hefur alltaf verið mikill og að sjá Víking spila í efstu deild á síðasta tímabili var frábært. Það var veisla allt sumarið, allir skemmtu sér og studdu við liðið og við vorum valin besta stuðningsliðið í Pepsi-deildinni 2013. Við erum stolt af því."

,,Þrátt fyrir að hafa fallið þá er enginn væll í okkur nú höfum við stofnað stuðningsmannafélagið Víkingasveitina sem mun standa þétt við bakið á Víking í allt sumar enda ætlum við liðinu aftur upp á meðal þeirra bestu. Þið munið finna fyrir okkur, þið munuð sjá okkur, þið munuð heyra í okkur jafnvel til Egilsstaða eins og einn maður sagði."

Vagn er bjartsýnn fyrir sumarið hjá Ólafsvíkingum í fyrstu deildinni og vonar að liðið berjist um að komast upp í Pepsi-deildina á nýjan leik.

,,Mér líst mjög vel á sumarið. Liðið er gott að mínu mati, þrátt fyrir að úrslitin hafi ekki alltaf fallið með okkur. Þrátt fyrir að hafa misst nokkuð marga leikmenn frá í fyrra að þá höfum við líka fengið nýja og ungu strákarnir af svæðinu eru meira og meira að koma inn í þetta. Ég hef fulla trú á að liðið komi til með að berjast í efri hlutanum, allavegana vona ég það."