Ísland flýgur upp um tólf sæti á nýjum heimslista FIFA sem var kynntur í morgun en liðið er í 34-35. sæti ásamt Serbíu.

3-0 sigurinn á Tyrkjum kemur liðinu upp um tólf sæti en Ísland hefur aldrei verið jafn ofarlega á heimslistanum í sögunni.

Fyrra met var orðið 20 ára gamalt eða frá september mánuði árið 1994 þegar Ísland komst í 37. sætið. Ásgeir Elíason heitinn stýrði Íslandi á þeim tíma og þegar listinn kom út hafði Ísland unnið þrjá vináttulandsleiki heima í röð, gegn Bólivíu, Eistlandi og Furstadæmunum.