Íslenska landsliðið skipað leikmönnum 21 árs og yngri háði magnaða endurkomu í undankeppninni fyrir EM 2019 í vikunni. Íslensku strákarnir sóttu lið Eistlands heim í Tallinn.

Eistar komust 1-0 yfir undir lok fyrri hálfleiks og í upphafi seinni hálfleiks voru heimamenn komnir í 2-0. Staða Íslands alls ekki góð, en strákarnir gáfust ekki upp.

Albert Guðmundsson, fyrirliði, minnkaði muninn á 56. mínútu og á 74. mínútu jafnaði Hans Viktor Guðmundsson metin.

Óttar Magnús Karlsson hafði komið inn á í seinni hálfleiknum og
hann kom Íslandi í 3-2 þegar tíu mínútur voru til leiksloka. Ísland náði að halda út og mögnuð endurkoma liðsins staðreynd.