Hallbera tekur innkast í dag.
„Þetta er einn af bestu leikjum sem ég man eftir. Manni leið ótrúlega vel inni á vellinum. Við vorum einhvern veginn með svör við öllu,“ sagði Hallbera Guðný Gísladóttir eftir glæstan sigur Íslands á Þýskalandi. Ísland hafði ekki skorað mark gegn Þýskalandi í 30 ár fyrir leikinn í dag en bætti um betur og skoraði þrjú í dag. Lokatölur 3-2 fyrir Íslandi sem byrjar undankeppni Heimsmeistaramótsins af krafti.
Lestu um leikinn: Þýskaland 2 - 3 Ísland
„Það var smá panik í restina þegar þær náðu að setja á okkur eitt mark í viðbót en ég var aldrei stressuð yfir þessu,“ sagði Hallbera en þýska liðið er í gríðarlega góðu líkamlegu formi og þekkt fyrir að gera út um leiki á lokamínútunum.
„Freyr er svo góður í að berja trúna í okkur. Hann var í rauninni búinn að leggja þetta svona upp fyrir okkur. Hann vissi að við myndum fá færin og við nýttum þau. Við hefðum getað verið 3-0 yfir í hálfleik.“
Íslensku landsliðskonurnar fá ekki langan tíma til að fagna en næsti leikur er strax á þriðjudag. Þá mætir Ísland sterku liði Tékka á útivelli. Við spurðum Hallberu að lokum hvort íslensku stelpurnar næðu að koma skrokknum í gott stand fyrir leikinn á þriðjudag.
„Við hlupum eins og vitleysingar í dag en við erum með frábært teymi með okkur og það er séð svo vel um okkur að þetta verður flott.“
Hægt er að horfa á allt viðtalið við Hallberu í spilaranum hér að ofan.
Athugasemdir
