Það á ekki að bera Romelu Lukaku saman við Lionel Messi en hann er frábær kaup fyrir Manchester United. Þetta segir Kevin De Bruyne, liðsfélagi Lukaku með belgíska landsliðinu.
Lukaku hefur skorað í tveimur síðustu æfingaleikjum Manchester United og fengið verðskuldað lof fyrir það hvernig hann hefur náð að smella inn í liðið.
„Hann mun standa sig mjög vel. Allir vita hverjir hans styrkleikar eru og hann mun gera það sem hann þarf að gera. Hann er með sinn leikstíl og það á ekki að bera hann saman við Messi. Hann er stór og sterkur og getur verið magnaður," segir De Bruyne.
„Þegar menn eru keyptir á háar fjárhæðir verða þeir oft fyrir stríðni á samskiptamiðlum. Það er ekki hægt að hugsa út í það. Þú verður bara að vinna þína vinnu. Ég held að han nmuni skora 20-25 mörk á tímabili fyrir United."
Lukaku hefur skorað 88 mörk í ensku úrvalsdeildinni síðan 2012 en aðeins Sergio Aguero hefur gert fleiri.
„Markahlutfall hans er magnað. Hann er einn sá besti í heimi og hvað er hann gamall, 24?" segir De Bruyne sem leikur fyrir erkifjendur United í Manchester City.
Næsti æfingaleikur United er gegn Real Madrid í San Jose á sunnudag.
Athugasemdir