„Það er margt svekkjandi við þennan leik. Við komumst yfir og vorum ferskar og mér fannst við vera með góð tök á leiknum. Síðan ná þær að jafna samt finnst mér eins og það sé góður kraftur í okkur. Eftir það erum við kærulausar í varnarleiknum og þær refsa okkur fyrir það," sagði fyrirliðinn, Sara Björk Gunnarsdóttir eftir 2-1 tap gegn Sviss á EM í Hollandi í kvöld.
Lestu um leikinn: Ísland 1 - 2 Sviss
„Þegar við þorðum að spila og skipta á milli kanta þar sem svæðin voru þá náðum við að spila vel. Það var eitthvað sem við hefðum átt að gera meira af í leiknum. Það voru óþarflega margir langir boltar þegar við gátum fundið einföld svæði sem við gátum spilað í. Við gerðum það á köflum eins og markið sem við skorum. Þá kemur bolti frá hægri yfir á vinstri þar sem Fanndís er ein. Þetta er eitthvað sem við hefðum getað gert meira af."
Lara Dickenmann sem skoraði fyrra mark Sviss í leiknum hefði hæglega geta fengið rautt spjald strax á fimmtu mínútu leiksins eftir karate-spark í Dagnýju Brynjarsdóttur.
„Hún hefði alveg eins geta fengið rautt. Síðan þegar líður á leikinn þá er hún að brjóta af sér og dómarinn gerir lítið í því. Dómarinn var svolítið spes," sagði Sara sem var greinilega allt annað en ánægð með sú rússnesku með flautuna.
„Ég get alveg viðurkennt það að ég var ekki ánægð með dómgæsluna í kvöld. Það hallaði miklu meira á okkur í leiknum. Aftur finnst mér það falla með hinu liðinu."
Sara Björk hefur spilað lengi í Evrópu og á hæsta leveli. Er þetta það besta sem hægt er að bjóða uppá?
„Í Meistaradeildinni er þetta betra. Síðan lendir maður stundum á lélegri dómgæslu. Ég ætla ekki að fara ræða og kenna dómgæslunni um það að við höfum tapað. Við áttum að gera betur í mörkunum sem við fáum á okkur. Við þurfum að skora úr föstum leikatriðum, við erum mikið sterkari en þær í föstum leikatriðum og við fengum horn og aukaspyrnur til að setja boltann inn," sagði Sara Björk sem segir að það sé aðeins eitt í boði fyrir lokaleikinn, burt sé frá því hvort liðið eigi séns á að komast áfram eður ei.
„Ég ætla að vinna næsta leik. Það er það eina sem ég hugsa um," sagði fyrirliðinn, Sara Björk Gunnarsdóttir að lokum.
Viðtalið í heild sinni má sjá í sjónvarpinu á morgun.
Fótbolti.net er með öflugt teymi í Hollandi og er hægt að fylgjast með öllu bak við tjöldin á Snapchat (Fotboltinet), á Instagram og öðrum samskiptamiðlum okkar.
Leikir Íslands á EM:
Ísland 0-1 Frakkland
Ísland 1-2 Sviss
Ísland 0-3 Austurríki
Athugasemdir