Þessi 33 ára miðvörður lék með Víkingum áður en atvinnumannaferill hans erlendis hófst. Sölvi hóf atvinnumannsferilinn hjá Djurgarden í Svíþjóð 2004 og spilaði svo einnig með SönderjyskE og FC Kaupmannahöfn í Danmörku áður en hann hélt til Rússlands og svo til Kína og Tælands.

„Ég er feginn að vera kominn heim og ég lít á þennan tíma úti sem mjög góðan og skemmtilegan. Ég hlakka mikið til og hef mikinn metnað til að standa mig hér á landi og sýna að ég geti enn spilað fótbolta," sagði Sölvi við 365 miðla á dögunum, eftir að hann opinberaði að hann myndi leika á Íslandi næsta sumar.

Víkingar enduðu í 8. sæti Pepsi-deildarinnar á liðnu tímabili. Logi Ólafsson heldur áfram sem þjálfari liðsins en Arnar Gunnlaugsson var á dögunum ráðinn aðstoðarmaður hans í stað Bjarna Guðjónssonar sem fór til KR til að verða aðstoðarmaður Rúnars Kristinssonar.