Chelsea gjörsigruðu Jose Mourinho, sinn gamla lærimeistara, og hans sveina í Man Utd þrátt fyrir að flestir höfðu spáð fyrir um jafnan og spennandi leik.

„Þetta var frábær byrjun og svo héldum við áfram að spila góðan fótbolta með mikilli ákefð í okkar leik. Við héldum líka hreinu sem var mikilvægt, þetta er sigur sem eykur sjálfstraustið," sagði Ítalinn en hann vildi hinsvegar ekki tjá sig um atvikið í fyrri hálfleik þegar David Luiz virtist fara með takkana í hnéð á Marouane Fellaini.

„Ég sá það ekki. Mér fanst Luiz spila frábærlega í dag en ég get ekki sagt til um hvort hann hefði átt að fá rautt spjald."

Conte var einnig spurður um leikrænar tilraunir sínar til að vekja áhorfendur á Stamford Bridge undir lok leiks." „Ég var að hlusta á stuðninginn sem Manchester United fékk stanslaust allan leikinn, svo ég bað okkar stuðningsmenn um að klappa fyrir okkur. Mér fannst leikmennirnir mínir eiga það skilið."