Aron Jóhannsson mætti á sinn gamla heimavöll í Árósum með bandaríska landsliðinu í vináttuleik með Dönum.

Aron skaust upp á stjörnuhimininn með liði AGF í dönsku úrvalsdeildinni og var þaðan keyptur til AZ Alkmaar eftir að hafa raðað inn mörkunum.

Þessi fyrrum leikmaður Fjölnis var í byrjunarliði Bandaríkjanna gegn Dönum og finnur sig greinilega vel á gamla heimavellinum. Hann kom Bandaríkjunum nefnilega í 2-1 fyrir skömmu.

Leikurinn er ekki búinn þegar fréttin er skrifuð, en Aron skoraði eftir undirbúning frá sínum gamla félaga hjá AZ Alkmaar, Jozy Altidore. Hér að neðan má sjá markið.