Ekki er ljóst hver þjálfar ÍBV næsta sumar en Eyjamenn bíða eftir svari frá Jóhannesi Harðarsyni sem fór í leyfi af persónulegum ástæðum um mitt sumar. Jóhannes er með samning en á þessari stundu er ekki víst að hann snúi aftur.

„Við erum að bíða eftir svörum frá Jóa og svo kemur í ljós hvort það verður af eða á hjá honum. Næsti kostur er Ási sem verið hefur með okkur en hans samningur er bara út tímabilið," segir Ingi Sigurðsson, stjórnarmaður hjá ÍBV, en Ásmundur Arnarsson tók við Eyjamönnum eftir að Jóhannes fór í leyfi.

„Þetta eru þeir tveir aðilar sem koma til greina hjá okkur eins og er. Í sumar var gert samkomulag við Jóa að gera hlé á samstarfinu meðan hann þyrfti tíma með sinni fjölskyldu. Nú er komið að þeim tíma að hann þurfi að svara okkur hvort hann geti staðið við sinn samning eða ekki. Ef það verður ekki er Ási eðlilega næsti kostur, við treystum honum fyrir verkefninu í sumar og myndum vilja ræða framhaldið við hann."