Martin Pedersen í Val (Staðfest)

Pedersen er 26 ára gamall en hann hefur leikið lengi í dönsku úrvalsdeildinni. Alls hefur Pedersen leikið yfir 150 leiki í dönsku úrvalsdeildinni en hann var áður í danska U21 árs landsliðinu.

Gunnlaugur Jónsson þjálfari Vals sagði við Fótbolta.net í kvöld að Pedersen sé hugsaður sem vinstri bakvörður en hann getur einnig leikið í miðverði og lék þar í síðari hálfleiknum í dag.

Pedersen lék með AaB Álaborg frá 2002-2008 og spilaði meðal annars með liðinu í Meistaradeildinni árið 2008 gegn liðum eins og Manchester United og Villareal. Í fyrra gekk Pedersen til liðs við Vejle en hann hefur einnig leikið með Sönderjyske á láni á ferli sínum.

Pedersen kemur til Vals í gegnum umboðsskrifstofuna Sportic en hann mun núna fara til Danmerkur í tíu daga áður en að hann kemur aftur til Íslands.

,,Ástæðan fyrir því að ég vill spila með Val er að ég vil spila með toppliði á Íslandi,\" sagði Pedersen við Fótbolta.net í kvöld.

Við komu Pedersen er ljóst að Valsmenn munu ekki semja við Steinarr Guðmundsson, fyrrum varnarmann Leiknis, en hann hefur æft með Val að undanförnu þar sem að liðið var í leit að manni til að fylla skarðið sem Bjarni Ólafur Eiríksson skyldi eftir sig þegar að hann fór til Stabæk á dögunum.

Annar erlendur varnarmaður lék með Val í æfingaleiknum í dag en sá er hægri bakvörður. Gunnlaugur ætlar að skoða þann leikmann betur á næstu dögum.

,,Ég ætla að fá að halda honum aðeins lengur. Mér leist vel á hann í leiknum og við ætlum að fá að skoða hann aðeins betur,” sagði Gunnlaugur Jónsson þjálfari Vals við Fótbolta.net í kvöld.