Björg Ásta og Guðný Þórðardætur til Vals (Staðfest)

Guðný Petrína Þórðardóttir er 25 ára gamall framherji sem snýr nú aftur í raðir Vals þar sem hún lék síðast árið 2000. Hún skoraði fimm mörk í 16 leikjum fyrir Keflavík í Landsbankadeildinni í sumar. Samtals hefur hún skorað 18 mörk í 78 leikjum í efstu deild, með Val, Breiðablik og Keflavík. Hún lék á sínum tíma 21 leik með Val og skoraði í þeim þrjú mörk.

Hún á að baki einn landsleik fyrir Íslands hönd sem var gegn Englandi ytra í maí í fyrra. Hún hefur spilað 18 landsleiki fyrir yngri landslið Íslands.

Björg Ásta Þórðarsdóttir spilar oftast sem varnarmaður en er fjölhæf og spilaði einnig á miðju og í framlínu fyrir Keflavík í sumar. Hún skoraði eitt mark í 16 leikjum með liðinu í Landsbankadeildinni í sumar.

Björg Ásta sem er 23 ára gömul og á að baki 8 landsleiki fyrir Íslands hönd auk þess að hafa leikið 45 leiki fyrir yngri landsliðin. Hún snýr nú aftur í raðir Vals þar sem hún hafði áður leikið í yngri flokkum. Samtals hefur hún leikið 84 leiki í efstu deild og skorað í þeim þrjú mörk.

Systurnar eru fyrstu leikmennirnir sem ganga í raðir Vals eftir að tímabilinu lauk en liðið hefur áður misst þrjá sterka leikmenn, Margréti Láru Viðarsdóttur, Guðbjörgu Gunnarsdóttur og Guðný Björk Óðinsdóttur sem allar fóru í atvinnumennsku í Svíþjóð.