Moyes segir að bensínið á tanki leikmanna sinna væri algjörlega á þrotum eftir þétt og erfitt leikjaprógram.

„Sigurinn gegn Tottenham í vikunni gerði strákunum erfitt fyrir. Við notuðum of mikla orku í þeim leik, en það er ekkert sem afsakar svona stórt tap. Strákarnir eru að þrotum komnir, bæði andlega og líkamlega. Þegar allt kemur til alls þá erum við sáttir með þrjú stig úr þessum tveimur leikjum," sagði Moyes að leikslokum.

„Við gáfum allt sem við áttum í dag, við áttum bara ekki meira en þetta. Við áttum lélegan leik og vorum orkulausir gegn sterkum andstæðingum sem áttu mjög góðan leik. Núna þurfum við að safna kröftum fyrir leikinn gegn Freiburg á fimmtudaginn."

Hamrarnir berjast við þýska félagið Freiburg um toppsæti A-riðils Evrópudeildarinnar. Lærisveinum Moyes nægir jafntefli á heimavelli til að tryggja sér toppsætið.

„Við þurfum að eiga mikið betri leik þá heldur en við áttum í dag."

West Ham er um miðja enska úrvalsdeild, með 24 stig eftir 16 umferðir.