Anton Ingi gegndi stöðu aðalþjálfara meistaraflokks og yfirþjálfara yngri flokka félagsins.

Hann er búinn að vera í þjálfarateymi meistaraflokks í fjögur ár. Fyrst kom hann inn sem aðstoðarþjálfari Jóns Óla Daníelssonar árið 2021 og hefur verið aðalþjálfari meistaraflokks og yfirþjálfari síðastliðin tvö tímabil.

Það er óvissa með framtíð meistaraflokks kvenna hjá Grindavík og ekki útilokað að liðið verði sameinað öðru á næsta tímabili.

Í síðasta mánuði var Anton orðaður við þjálfarastöðuna hjá Keflavík sem hefur ekki tilkynnt hver mun stýra liðinu á næsta tímabili.

Úr tilkynningu Grindavíkur:
Þetta tímabil hefur verið okkur sérstaklega krefjandi innan vallar sem utan og hefur Anton Ingi tekið að sér mörg auka verk fyrir félagið í þessum aðstæðum sem ekki voru í hans verkahring og fyrir það erum við honum einstaklega þakklát.

Við viljum þakka Antoni Inga fyrir gott samstarf og vel unnin störf fyrir félagið um leið og við óskum honum góðs gengis í framtíðinni