Það hafa nokkrir Íslendingar komið við sögu í leikjum dagsins í skandinavíska boltanum, þar sem Hafrún Rakel Halldórsdóttir skoraði jöfnunarmark fyrir Bröndby í úrslitaleiknum um toppsæti dönsku deildarinnar.
Hafrún Rakel var í byrjunarliði heimakvenna í Bröndby ásamt Kristínu Dís Árnadóttur á meðan Emilía Kiær Ásgeirsdóttir var í byrjunarliði Nordsjælland.
Liðin mættust í sannkölluðum titilslag í lokaumferð deildartímabilsins, þar sem Nordsjælland var með tveggja stiga forystu á toppinum fyrir upphafsflautið.
Staðan var markalaus í leikhlé en Winonah Heatley skoraði fyrir Nordsjælland í upphafi síðari hálfleiks og var Hafrún Rakel snögg að jafna metin.
Það dugði þó ekki til, Bröndby tókst ekki að gera sigurmark og lýkur því keppni í öðru sæti á tímabilinu. Emilía Kiær og stöllur eru Danmerkurmeistarar 2024.
Hin efnilega Emelía Óskarsdóttir sat þá á varamannabekk Köge í 1-0 sigri rétt eins og Sunneva Hrönn Sigurvinsdóttir í góðum sigri AGF á útivelli.
Köge endar í þriðja sæti deildarinnar, þremur stigum á eftir toppliði Nordsjælland.
Í fallbaráttunni var Snædís Lilja Daníelsdóttir varamarkvörður Österbro í tapi gegn B93 á meðan Arna Þráinsdóttir lék allan leikinn í 3-0 sigri OB gegn Thisted.
Þá fóru einnig leikir fram í efstu deild norska boltans, þar sem Ásdís Karen Halldórsdóttir kom við sögu í afar sterkum 3-1 sigri Lilleström gegn Rosenborg
LSK er í fjórða sæti eftir sigurinn, með 20 stig eftir 12 umferðir - tíu stigum eftir Rosenborg sem er í toppbaráttu við Vålerenga.
Valerenga lagði Brann að velli 2-0 en enginn Íslendingur var í hóp í þetta skiptið.
Að lokum lék Íris Ómarsdóttir allan leikinn í markalausu jafntefli Stabæk gegn Lyn. Stabæk er um miðja deild með 19 stig.
Bröndby 1 - 1 Nordsjælland
0-1 Winonah Heatley ('48)
1-1 Hafrún Rakel Halldórsdóttir ('51)
B93 2 - 0 Osterbro
Odense 3 - 0 Thisted
Valerenga 2 - 0 Brann
Stabæk 0 - 0 Lyn
Lillestrom 3 - 1 Rosenborg
Athugasemdir