FH-ingar heimsóttu Val á N1-völlinn í kvöld. Reyndist leikurinn hin mesta skemmtun og enduðu leikar með 4-4 jafntefli. Leikurinn var mikill markaleikur og því við hæfi að senda fyrrum framherjann og núverandi aðstoðarþjálfara FH, Kjartan Henry Finnbogason í viðtal.
„Mér fannst þetta bara skemmtilegur leikur og við vorum ánægðir með sóknarleikinn en jafnvægið kannski ekki alveg nógu gott. Við hleyptum þessu of mikið í fram og til baka fótbolta, sem Valur eru mjög góðir í og þeir skoruðu þrjú mörk. Ég held að jafntefli hafi bara verið sanngjörn niðurstaða," sagði Kjartan Henry Finnbogason, aðstoðarþjálfari FH.
Lestu um leikinn: Valur 4 - 4 FH
Björn Daníel Sverrisson og Ahmad Faqa sem hafa verið lykilmenn í liði FH á þessari leiktíð, fengu það hlutverk að verma bekkinn á N1-vellinum. Davíð Þór Viðarsson, yfirmaður knattspyrnumála, hefur sagt að það sé stefna FH að spila á yngri leikmönnum og segir það vera ástæðu fyrir þjálfarabreytinguna sem er í vændum.
„Nei, nei, Ahmad var í landsliðsverkefni og ég get ekki einu sinni rakið það hversu langt það ferðalag var. Ég held að það ferðalag hafi tekið hann einhverja 70 klukkutíma að komast til baka, þannig að hann var bara þreyttur. Svo var Bjarni bara frábær í dag og kom inn í liðið fyrir Björn. Við erum ekkert að byrja á því (innsk. að spila ungum leikmönnum) núna."
Mikið hefur verið rætt og ritað um þjálfarastöðu FH en ákveðið hefur verið að endurnýja ekki samstarfið við Heimi Guðjónsson. Vekur það furðu margra, þar sem að hann virðist ætla að skila ungu og reynslulitlu FH-liði í 5. sæti Bestu deildar karla. Því liggur beinast við að ráða aðstoðarmanninn, eins og venja er í Bestu deild karla, eða hvað?
„Já, ég meina, ef mér byðist það, að þá myndi ég að sjálfsögðu skoða það en mér skilst að það sé búið að ráða í þá stöðu, þannig að það á bara eftir að koma í ljós hver það verður.
Aðspurður segist Kjartan Henry ekki vita hver arftaki Heimis Guðjónssonar verður.
„Nei, ég hef ekki hugmynd."
