Besta deild kvenna: Santa með þrennu í fyrsta leik

Nýliðar Grindavíkur/Njarðvíkur hafa verið að spila frábæran fótbolta í Bestu deild kvenna í sumar og tóku á móti Þrótti R. í eina leik kvöldsins.

Þórdís Nanna Ágústsdóttir tók forystuna snemma leiks eftir að liðsfélagar hennar höfðu unnið boltann hátt uppi á vellinum og hélt Þróttur forystunni allt þar til undir lok fyrri hálfleiks.

G/N tók völdin á vellinum og jafnaði Hildur Katrín Snorradóttir metin á 44. mínútu, með skalla eftir góða fyrir gjöf frá Júlíu Ruth Thasaphong.

Kristrún Ýr Holm endurheimti forystu gestanna eftir mikinn atgang í kjölfar hornspyrnu í upphafi síðari hálfleiks en Santa Sanija Vuskane tók til sinna ráða á lokakaflanum.

Santa er lettnesk landsliðskona sem samdi við G/N á dögunum og var að spila sinn fyrsta leik fyrir félagið í kvöld. Santa kom inn af bekknum á 66. mínútu og skoraði með því sem var líklega hennar fyrsta snerting skömmu síðar eftir óöryggi hjá Mollee Swift á milli stanga Þróttar.

Staðan var þá orðin 2-2 og fengu bæði lið færi til að taka forystuna á lokakaflanum. Santa reyndist óstöðvandi, hún fékk gott færi sem fór forgörðum en náði svo að skora eftir frábæra fyrirgjöf frá Ásu Björg Einarsdóttur á hægri kanti. Óljóst er hvort Santa eða varnarmaður Þróttar hafi náð snertingunni á boltann.

Santa var hvergi hætt og fullkomnaði þrennuna sína skömmu eftir annað markið. Í þetta skiptið nýtti hún sér skelfileg mistök í varnarlínu Þróttar og refsaði með marki. Meira var ekki skorað og urðu lokatölur 4-2 eftir magnaða innkomu Santa í hennar fyrsta leik á Íslandi.

TENGT EFNI19.07.26 - 06:00

Lettnesk landsliðskona í Grindavík/Njarðvík (Staðfest)