Leicester City er komið með annan fótinn í ensku úrvalsdeildina eftir að liðið kjöldró Southampton, 5-0, á King Power-leikvanginum í Leicester í kvöld.

Hinn 20 ára gamli Issahaku Fatawu gerði sér lítið fyrir og skoraði þrennu fyrir heimamenn.

Fatawu skoraði fyrsta markið á 25. mínútu eftir að Kiernan Dewsbury-Hall þræddi hann í gegn áður en Wilfred Ndidi tvöfaldaði forystuna þegar hálftími var eftir.

Hausinn á Southampton-mönnum hrundi í grasið eftir annað markið og tókst Leicester að skora þrjú mörk á sex mínútum.

Fatawu skoraði annað mark sitt á 75. mínútu áður en Jamie Vardy kom Leicester í 4-0 fjórum mínútum síðar. Þrenna Fatawu var fullkomnuð á 81. mínútu, hans fyrsta fyrir félagið.

Leicester með 94 stig á toppnum, fjórum stigum meira en Leeds sem er í öðru sæti. Ipswich er í 3. sæti með 89 stig en á þó leik til góða. Southampton á enn tölfræðilegan möguleika á að komast beint upp, en umspil er líklegasta niðurstaðan.