„Úff, þetta var léttur iðnaður en það er bara gaman að þessu. Þetta var ströggl í byrjun, völlurinn erfiður, mjúkur, loðinn, rosa þurr. Jafnvel búið að henda einhverju harpixi á hann þarna," sagði Birnir Snær Ingason, leikmaður HK, en hann jafnaði metin fyrir HK-inga í síðari hálfleiknum. HK vann leikinn að lokum 2-1 og fer áfram í Mjólkurbikarnum.
Lestu um leikinn: Magni 1 - 2 HK
Birnir var spurður að því hvort það hafi verið erfitt að gíra sig upp í þennan leik eftir stórsigurinn gegn Íslandsmeisturum KR um síðustu helgi.
„Nei nei, mér fannst það svosem ekki. Ég var alveg spenntur fyrir þessum leik, geggjað að fá leik í miðri viku og eftir einn til tvo daga eftir KR leikinn var maður bara kominn niður á jörðina."
Birnir jafnaði leikinn á 68. mínútu eftir sendingu frá Ásgeiri Marteinssyni. Birnir var sáttur með að vera kominn á blað í sumar.
„Já það var geðveikt. Það var kominn tími á það, síðasta tímabil var mjög erfitt og bara geggjað að komast á blað svona snemma á seasoninu."
„Þriðja skiptið sem ég fæ Grenivík í bikarnum hérna úti. Það hefur alltaf verið djöfulsins basl sko, ég held að við séum búnir að vera 1-0 undir í hálfleik í öllum þessum þremur leikjum sem ég hef spilað. Þannig að það er ekkert grín að koma hérna til Grenivíkur."
Að lokum var Birnir spurður að því hvort það væri einhver drauma mótherji í næstu umferð í bikarnum.
„SR, unnu þeir ekki Val eða? Nei nei okey það var tæpt. Ég veit það ekki, bara eitthvað."
Nánar er rætt við Birni í spilaranum hér fyrir ofan.
Athugasemdir
