Bjarni Guðjón Brynjólfsson skoraði fyrra mark leiksins í 1-1 jafntefli hjá Þór og KA í úrslitaleik Kjarnafæðismótsins í dag.
Lestu um leikinn: Þór 8 - 7 KA
Bjarni Guðjón náði forystunni fyrir Þór með glæsilegu en KA jafnaði á lokamínútunum svo leikurinn réðist eftir vítaspyrnukeppni. Þar hafði Þór betur og varði titilinn á milli ára.
„Ég hef aldrei unnið þetta mót áður svo þetta er frábært og gaman að gera það í vító. Þetta var erfiður leikur, það er alltaf alvöru slagur þegar Þór og KA mætast, ég held það séu ekki til skemmtilegri leikir en þetta," sagði Bjarni hikstandi en brosandi að leikslokum, en honum var skipt af velli fyrir vítaspyrnukeppnina.
„Það var spennandi og stressandi að fylgjast með þessu en gaman útaf því að þetta endaði vel. Þetta var svakaleg varsla hjá Aroni."
Mark Bjarna var einstaklega laglegt þar sem boltinn barst skoppandi til hans utan vítateigs. Bjarni smellhitti boltann sem skaust í stöngina og inn, gjörsamlega óverjandi skot.
„Boltinn datt bara fullkomlega fyrir mig og ég held ég hafi bara aldrei hitt hann svona vel. Mér leið mjög vel inni á vellinum, við spiluðum vel svona 2/3 af leiknum."
Bjarni er uppalinn hjá Þór en lék með FH í Bestu deildinni í fyrra og er spenntur að taka slaginn með uppeldisfélaginu.
Athugasemdir
