Nýttu sér að FH-ingar voru eins og „villuráfandi sauðir" - „Eigum að vera með hugarfar stórs liðs"

„Við jöfnum á 83. mínútu og eftir það hlaupum við af stað í einhverja vitleysu og það er komið mark í andlitið strax. Í stað þess að halda haus, vera klókir og halda skipulaginu," sagði Heimir Guðjónsson, þjálfari FH, í viðtali við Fótbolta.net eftir leikinn. Í viðtali við mbl.is líkti hann sínu liði við villuráfandi sauði.

„Við feng­um gott færi áður en við skoruðum. Svo erum við bara eins og villuráfandi sauðir. Þeir bara sparka fram á Viðar og allt í einu er bolt­inn kom­inn úr á væng og svo bara send­ing og mark," sagði Heimir við Einar Sigtryggsson á mbl.is.

Hallgrímur Mar Steingrímsson, leikmaður KA, var eðlilega mjög kátur með sigurinn og ræddi um sigurmarkið.

„Ég veit ekki hvað gerist, ætli Bjarni hafi ekki loksins tekið mark á því sem ég sagði; að koma sér inn i box. Ég sagði að hann myndi skora í þessum leik, hann var ósáttur með að hafa klúðrað fyrra færinu sínu, hann skilaði sér inn í box og geggjuð sending frá Geira. Þeir voru kannski sofandi eftir markið, þetta voru fáar sekúndur milli marka, en djöfull var fallegt að sjá hann inni," sagði Grímsi.

Nafni hans, Hallgrímur Jónasson þjálfari KA, var sömuleiðis kátur með sigurmarkið.

„Það var náttúrulega frábært, eins og ég er alltaf að tala um; eigum að vera með hugarfar stórs liðs, ekki fara niður og vera litlir í okkur og hræddir. Það sama gerðist á móti Val, lentum 2-0 undir en fengum dauðafæri 10 sekúndum seinna. Við eigum að keyra á þetta, upp með hausinn og áfram gakk. Það var fallegt að sjá það, sérstaklega eftir svona óheppnismark, boltinn fer í einhvern, endar í Rodri og lekur inn. Það var gaman að sjá að menn risu upp í staðinn fyrir að vera litlir í sér eða of svekktir," sagði Haddi.

Það helsta úr leiknum má sjá hér að neðan og þar fyrir neðan má nálgast viðtölin eftir leikinn í fullri lengd.