Ungur miðvörður í byrjunarliði Liverpool á laugardag?

Liverpool varð fyrir áfalli í sigrinum á Midjtylland í gær þegar Fabinho fór meiddur af velli í fyrri hálfleik. Virgil van Dijk spilar mögulega ekki meira á þessu tímabili og miðvörðurinn Joel Matip er einnig á meiðslalistanum. Dejan Lovren var seldur til Zenit St Pétursborgar í sumar.

Fabinho hefur því byrjað í hjarta varnarinnar í síðustu tveimur leikjum en nú er útlit fyrir að hann missi einnig af næstu leikjum.

Hinn 19 ára gamli Rhys Williams tók stöðu Fabinho í gær og hann gæti nú fengið tækifæri í byrjunarliðinu gegn West Ham á laugardaginn. Jurgen Klopp, stjóri Liverpool, segir að erfitt sé að segja hvort Matip eða Fabinho nái þeim leik.

<i>„Ef þetta væri einn leikur, síðasti leikur tímabilsins, þá gætum við kannski látið annan þeirra verða klár í einn leik en síðan spilum við aftur þremur dögum síðar og svo aftur þremur dögum eftir það og þá þurfum við líka leikmenn,"</I> sagði Klopp.

Auk Williams koma hinn 17 ára gamli Billy Koumetio og hinn 23 ára gamli Nathaniel Phillips til greina í hjarta varnarinnar í næstu leikjum.